新年快樂，猴年進步。
小編新年放咗個長假，去咗旅遊，順便俾對腳同心靈休息一吓。小編今日剛回港，急不及待同大家繼續介紹球鞋。
承上post所說嘅adidas綠色旋風，小編也忍不住買咗對平底足球鞋一試。小編睇中嘅係Adidas ace 16.3 primemesh，為adi石地系列的尾二平版。Adidas嘅鞋嘅質素與價錢嘅高低係由16.1，16.2，16.3同16.4咁樣如此類推。小編好少睇中啲.3同.4嘅鞋，因為始終質素一向都係普普通通同無咩驚喜。但係今次見到嘅.3，小編拎過上手，又晌鋪頭試過上腳，今次嘅.3係有啲唔同。
呢對.3個名已經同以往好唔同，佢晌後面加咗個primemesh嘅字眼。Primemesh嘅設計藍圖有啲似釘boot貴版嘅primeknit，用纖維織皮造成，俾人貼腳同容易操控皮球嘅感覺。Primemesh嘅設計都係咁，不過係平版，啫係用嘅料差啲，球感都會相對無咁好咁。16.3primemesh嘅鞋頭位置係用上primemesh，鞋身同踭位就用上普通球鞋嘅合成皮。
16.3primemesh另一賣點係佢嘅中筒。佢個筒就無nike咁高咁堅韌，佢設計係低啲，相信靈活性也會好啲，但係筒嘅保護足踝能力也相對咁低咗。16.3primemesh嘅中筒布料係同鞋舌連埋，俾人有種著襪踢波嘅體貼感覺。
鞋底上，16.3primemesh用上嘅鞋底同以往嘅.3系列分別不大，佢鞋底較薄，感覺上應該避震功能麻麻咁。
小編就拎咗對鞋去某東九龍五人場跟隊切磋球技同試試球鞋嘅感覺。對鞋買正常size就得，無大到無細到，啱啱好。佢鞋踭唔刮腳，唯一有啲刺痛嘅係鞋頭同鞋身嘅接駁位，小編估嘅係應該質地上前後位置嘅唔同。但係呢個感覺晌過咗三四個字後就無咗，呢個應該就係16.3primemesh嘅“開鞋”時間。
用咗喱三四個字去適應對鞋，最令小編深刻嘅係長傳嘅質素，斬波上係好到位，小編估最大嘅原因係primemesh同鞋底薄。
晌短傳同射門上16.3primemesh就無咩特別，不過可能primemesh較薄嘅關係，射波係會幾食力嘅，腳面射門效果係幾好。控波上球鞋就無咩驚喜咁。
至於扭波，可能鞋身未完全林晒嘅關係，扭波無以往嘅順，過到一個，個波推前咗，就過唔到第二個。不過小編估計過一排鞋皮林咗，扭波質素應該會好好多。
踢咗幾場波，16.3primemesh唔需要小編擔心鞋舌向左走向右走嘅問題，佢鞋帶設計唔錯，踢左兩個幾鐘無烏低過身綁鞋帶。
踢完抖一抖，估唔到嘅係腳底又唔係好累，睇嚟佢鞋底雖薄，但係避震能力上都算不俗。
總括嚟講，始終呢對球鞋係adidas嘅第三級別，我地又無得要求咁多。佢適合喜歡長傳嘅你。ace 16.3 primemesh定價為約$650港幤，小編就係襯佢八折時買。
呢對鞋都適合貪新鮮想試下中筒球鞋，但係又唔想俾咁多錢買nike嘅你。不過當然啦，一分錢一分貨，質素16.3primemesh係低啲咁話。
#adidas #ace16.3 #primemesh #高筒 #techfit #平底 #石地場 #室內場 #五人足球 #七人足球 #波boot #足球鞋 #足球鞋實測 #評測
Search